將睿金誠剛夜泥發威 06/05/2026 現年39歲嘅英國好手金誠剛，來港客串一年多啲，畀到馬迷印象最深嘅應該係泥地成績特別耍家，亦符合佢貴為2020/2021年度馬季英國全天候賽事冠軍騎師身份。而金誠剛喺沙田泥地夜賽表現更加醒神，舊年3月26日騎3隻全部贏晒，而啱啱上個月1日嘅全泥宴，佢同樣只騎「風繼續吹」、「勇者無敵」同埋「將睿」3駒，亦取得2冠1亞，成功率驚人。到咗今晚全泥宴，金誠剛又係只得3匹坐騎，「川河型駒」及「多多開心」近況一般，相信有機會為佢增添進帳嘅係泥地好手「將睿」。 金誠剛 「將睿」呢匹由游達榮訓練嘅愛爾蘭自購馬，暫時賽績的確係泥優於草，兩度喺三班泥地1650米建功，都係由金誠剛執韁，今次刻意等到泥地夜賽再上陣，埋門喺從化試多課大閘先跑，擺明目標在此。值得一提，除咗「將睿」，馬主七俠五義團體同場亦有另一匹名下馬「將義」同室操戈，雖然「將義」喺香港冇跑過泥地，但父線係美國馬「海軍旗幟」，在港同父馬如「樂勝天下」就可以應付泥地，若然最終與「將睿」構成同主Q，必屬一時佳話啦！ 「將睿」上仗贏泥地一哩