觀眾之力回饋黃婉曼 06/05/2026 由主播升呢做馬主嘅，除咗「天下寵兒」馬主周嘉儀外，梗係唔少得由報天氣再轉戰幕前，早幾年做埋馬主嘅黃婉曼(Icy)啦，Icy之前有份嘅跳出香港團體名下嘅「跳出香港」曾經贏過G2，而佢自己名下首駒「觀眾之力」，上季出道後表現唔算突出，點知今季抖咗9個幾月復出，竟然喺初跑泥地1200米嘅情況下打開勝門，無令入場打氣嘅Icy失望，終於可以拉頭馬。 馬主黃婉曼 聽黃婉曼講，「觀眾之力」來港初期曾受傷，舊年10月中又試過右前腿肌腱受傷，都要抖多半年，因為佢同方嘉柏都覺得以馬匹健康為先，上仗抖咗9個幾月復出，都係熱身性質，估唔到咁快可以贏到，自己都有驚喜。 「觀眾之力」剛戰泥地開齋 不過，Icy都話好相信方嘉柏嘅部署，因此每次出賽都好有信心。至於點解叫「觀眾之力」，Icy話愛駒嘅英文名叫Target Audience，自己又係做幕前，覺得要贏馬就要有馬迷支持，所以改咗呢個馬名，今次升上三班再跑泥地1200米，希望順利再贏多場。