文明戰士試閘好省鏡 06/05/2026 葉楚航目前15場頭馬，距離達標尚欠1W，而航哥對上一次全泥夜宴憑「偵探傳奇」及「贏得自然」起孖，嚟到季內最後一次全泥夜宴，練者當然希望再次爭取佳績。 葉楚航 當中跑第3場四班1200米的「文明戰士」相信吸引到唔少人嘅目光，如果齋睇賽績，呢匹3歲澳洲自購新馬上仗初出跑田草1000米直路賽大敗而回，不過埋門於布文胯下試1200米泥閘大勝4個多馬位，騎者按韁過終點，走勢非常搶眼，初跑泥地絕對不容忽視。 「文明戰士」最近由布文試泥閘大勝而回。 優才換人決心再拚 另外，沙田馬場昨晨落住濛濛細雨，無阻各路人馬積極備戰，7時30分，葉楚航馬房戰駒亮相，「贏得自然」及「優才」都甚搶鏡，由助手騎往機坪熱身再出內圈踱步，兩駒暗火冒升狀態具作戰水準，航哥一早踩車到機坪欄邊守候，望足全程唔眨眼，懶理細雨照頭淋，15分鐘後操畢又到閘口接馬，一副搏殺格局。 「贏得自然」勝後繼續全力砥礪未有放緩，原裝配搭擺明力求連捷。「優才」在前仗泥地一哩跑第6名所負接近，搵番班德禮主轡決心再拚。