輝哥靠愛徒衝1,100W 09/05/2026 啱啱禮拜三泥地夜賽，姚本輝有心出擊，可惜「超加加」及「樂勝天下」兩匹由徒弟袁幸堯(Nicola)執韁嘅賽駒只得亞軍，而喺「超加加」返回解鞍時，輝哥捉實袁幸堯哦咗一輪，口中唸唸有詞，似乎對該場發揮有啲微言。不過，始終都係減10磅嘅見習生，自然需要多啲實戰經驗，而喺今日沙田賽事，輝哥繼續對徒弟委以重任，將5駒交畀袁幸堯策騎，當中更有機會靠Nicola為自己拎到在港從練第1,100場勝仗。 「極速神影」埋門試泥閘催谷，立心搏殺。 喺1995年開倉嘅姚本輝，原來在港已累積1,097場頭馬，只差3W就夠1,100場，而佢今日屯重兵出擊，單係上半場3匹由袁幸堯主理嘅質新馬「永福」、「極速神影」同埋「輝灑自如」均有爭勝機會。角逐頭場新馬賽嘅「永福」，早於3月尾試田草800米草閘有走勢，埋門從化再試兩課閘磨起狀態，今次用袁幸堯只負111磅，非常有利。至於「極速神影」及「輝灑自如」上仗均於Nicola胯下入三甲，「極速神影」熱身後再試閘，走勢有進步；而「輝灑自如」上仗一出即勝，表現出色，今次負磅依然唔算重，有權再下一城。如果由有「輝」字馬名嘅馬房團體馬為輝哥帶嚟第1,100W更有意義啦！