翠紅旺勢力爭3連捷 09/05/2026 近期最旺嘅馬主，「浪漫」系嘅劉栢輝同埋唐獻芳肯定榜上有名，近期頻頻捧盃，好似唐獻芳有份嘅「祝願」上月尾終於攻下冠軍一哩賽，首度揚威G1，同日劉生嘅「浪漫勇士」就順利4奪女皇盃，然後佢哋兩位夾份嘅「浪漫戰神」於剛周日以下犯上勇奪G3皇太后紀念盃。今日沙田賽事，劉栢輝及唐獻芳有份嘅紅粉精英團體賽駒「翠紅」出戰第11場二班1200米，有機會挾旺勢成功食尾胡。 「翠紅」上賽田草1200米再下一城。 今季初順利完成跨季3連捷嘅「翠紅」，其後卻愈跑愈差，2月初嘗試增程初跑一哩挑戰香港經典一哩賽，最終只得第11名，經過一輪休息，廖康銘決定讓此駒回師短途兼重戴眼罩，結果喺二班谷草1200同田草1200米連贏兩場，上仗更加擊敗當銳嘅「扶搖勢勁」及「閃耀天河」，表現更進一步。今次「翠紅」再跑二班田草1200米，只係多孭2磅，的確有着數，即使面對未輸過嘅「喜慶寶」，但後駒首次升上二班兼換人，又抽外檔，以「翠紅」近期嘅水準，當有機會爭取3連捷。