潘頓搏硬開心三多 17/05/2026 今季來港開倉嘅南非練馬師桂福特，無疑早期真係兵微將寡，但佢迅速打響名堂，唔少賽駒加盟後亦立即變身，令佢依家已經成為逾70駒嘅大倉，認真犀利。不過，自從上個月26日憑質新馬「堅先生」建功後，桂廐已經連續5次賽事無馬贏，難怪今日強陣派10駒出擊，擺明要打開缺口，其中由潘頓執韁嘅「開心三多」更有機會幫佢先拔頭籌。 潘頓 桂福特開倉後自然特別關照喺南非做過佢徒弟嘅田泰安，另外同鄉希威森亦幫佢贏過幾場，反而仲未同冠軍騎師潘頓合作贏馬，騎練兩人13次攜手出擊只得2亞4季。不過，今次呢匹「開心三多」加盟桂廐後，潘頓已經騎咗兩次，去年12月尾跑泥地1800米三甲不入，但剛戰再用潘頓跑泥地同程已經得季軍，證明馬匹目前評分有優勢，今次雖然轉跑田草1800米，但既然此駒3月初喺谷草1800米入Q，反映草地性能不算差，況且潘頓過往曾為同主馬「開心寶寶」建功，睇吓今次能否憑「開心三多」取得同桂福特合作首W？ 「開心三多」近期五班賽一再有獎金。