三強助鄭俊偉上岸 20/05/2026 鄭俊偉今季初接收咗唔少前容廐賽駒，馬房立即壯大不少，亦令佢可以喺從化同埋沙田兩地設廐，但同時亦令佢今季嘅達標頭馬數字由14W變成16W，所以目前只有15場頭馬喺手嘅米高哥，暫時都仲差1場頭馬先達標，但距離馬季結束仲有個幾月，相信應該冇難度啩。 鄭俊偉 而喺今晚跑馬地賽事，鄭廐雖然只係派「三強」同埋「好評如潮」上陣，但兩駒都有近績支持，有望可以幫到米高哥順利畢業。 「三強」四班谷草1200米分量十足。 小休後再攻首本路程 角逐第3場四班1200米嘅「三強」，去年12月10日喺楊明綸胯下贏四班同程，蹄下敗將包括現居三班嘅「東來欣賞」同埋「紅錢到」，水準唔差，可惜之後表現平平，直到最近連續兩仗喺谷草1200米取得季軍，反映馬匹狀態回勇，今次刻意小休個多月再攻首本路程，更重配贏馬功臣楊明綸，埋門刻意安排彈草閘，工夫做足，現時評分只比贏馬時高1分，應該有機會再添頭馬。