黃寶妮27歲魅影生輝 24/05/2026 雖然黃寶妮（Britney）喺啱啱禮拜三谷戰始終未能拎到佢首場跑馬地勝仗，但依然非常有運，事關佢策騎嘅「安康萬里」出閘嚴重失蹄，馬頭幾乎點到地，搞到Britney失去平衡幾乎跌落嚟，好彩最終有驚無險，相信必有後福。咁啱尋日就係Britney嘅27歲生日，睇嚟呢位壽星女有機會喺今日大賽日贏馬補祝牛一，主角就第1場五班1600米嘅希廐馬「東方魅影」。 黃寶妮 5歲澳洲PPG「東方魅影」至今出賽25次仍未出頭，質素的確唔算突出，但今季先後喺谷草1000米、1200米同埋泥地1650米3項唔同路程入Q，證明喺五班係有競爭力，剛戰首次起用黃寶妮減磅跑泥地一哩，沿途擺前走，最終不敵「大利好運」，表現已算有進步，同時反映有長力應付一哩，今次原班人馬轉爭田草1600米，只孭111磅輕飄飄，即使抽不利嘅14檔，但既然上仗13檔都可以擺前走，今次有權照辦煮碗，可望成為黃寶妮嘅賀壽馬。 「東方魅影」（左）上仗泥地一哩配黃寶妮快放得亞軍。