艾兆禮復出再稱帝 24/05/2026 意大利好手艾兆禮啱啱禮拜三停賽缺陣一期，今日強勢復出有9匹坐騎，當中包括兩匹新勝馬「安帝」及「櫻花酒杯」，相信可以幫佢復出即刻有頭馬進帳，繼續威脅布文嘅二哥地位。 艾兆禮 講起蔡廐「安帝」，呢匹4歲英國自購馬都算適應得快，來港頭兩仗表現一般，前仗改用艾兆禮增程跑田草2000米立即跑第3名，剛戰再攻同程遇上大爛地，順利後上擊敗「友瑩光」打開勝門，表現相當出色。 聽馬主王忠秣講，其實當役「友瑩光」鞍上人潘頓發揮已經好好，但艾兆禮亦騎足100分，頭馬絕對要歸功騎師嘅努力，同埋王忠秣話雖然賽日落大雨令場地變淋，但愛駒係英國馬，喺嗰邊跑慣軟地，所以都唔太擔心，結果順利開齋，冇令幕後失望。 與友瑩光狹路相逢 今次「安帝」縮程跑1800米再遇「友瑩光」，由上次受讓12磅變今次受讓8磅，依然有優勢，近期天氣唔穩定，相信場地有機會繼續起變化，馬匹埋門喺從化試嫌短嘅1200米草閘都追得好，反映狀態更進一步，有望再下一城。