桂福特食奇異果轉運 31/05/2026 以往唔少新開倉嘅練馬師，季初都要啲時間適應，反而去到馬季後段先入局慢慢取得好成績，但今季來港發展嘅南非倉主桂福特，情況反而有啲唔同，頭3個月已經贏咗6W兼有場三級賽落袋，馬房陣容迅速擴大，兵源大增，點知自從4月26日憑「堅先生」建功後，足足個幾月無進帳，對一個新馬房嚟講，情況比較少見。 桂福特 今日沙田賽事，桂廐派出5駒上陣，梗係想盡快結束頭馬荒，讓馬房重拾正軌喺季尾再發動一輪攻勢，其中第10場三班1600米嘅「奇異果」有機會幫佢打開缺口。呢匹4歲新西蘭自購馬由於左前腿肌腱同埋肱骨先後受傷，即使加盟桂廐後仍一直未能上陣，惟剛戰抖咗近10個月復出跑田草1400米，兼且初戴交叉鼻箍上陣，結果後上跑第7名，落後同日跑G3嘅「首飾天空」4馬位，而同場殿軍「臻至辰」最近已補中，反映水準不差，拚後難得「奇異果」可以再試大閘打磨，反映健康無問題，今次增程應該更合腳法，值得重視。 奇異果養好傷操好才復出。