喆喆友福爭連捷 03/06/2026 「友福」系馬主蘇永強，有段時間希望名下嘅馬清一色由1位騎師包辦操練同出賽，但依家佢嘅馬已經分別擺喺沈、丁同鄭3廐，只用1位騎師似乎唔太可行，在靈活運用唔同騎師下，今季「友福」系馬匹成績都唔差，「天天友福」先後喺楊明綸及何澤堯胯下建功，「年年友福」季內2W嘅功臣分別係田泰安及潘頓，而今晚角逐第2場五班1200米嘅「喆喆友福」，剛戰終於喺潘頓胯下開齋，今次抖咗個半月再用呢位冠軍騎師，有望再下一城。 「喆喆友福」上仗由潘頓補中贏馬。 聽蘇永強講，「喆喆友福」前仗落敗後，潘頓同沈集成條氣都唔順，覺得愛駒形勢差當無跑過，所以匆匆再出，結果順利補中，佢亦提到當初喺新西蘭2歲馬拍賣會引入呢隻馬時，有10幾位練馬師同自己一齊出價，最後花咗55萬紐元先投到，所以對愛駒有一定期望，而佢認為「喆喆友福」在港初期未閹表現一般，但做完閹割手術後，健康曾有啲反覆，而沈集成覺得肯定會有頭馬見面，結果上仗終於做到，相信今季可以贏多場，今次機會相當樂觀。