志醒大將1800泥料 05/06/2026 睇番現時練馬師榜形勢，似乎係方嘉柏、沈集成同埋廖康銘3位少少帶開咗，前晚跑馬地賽事，呢3位倉主亦有進帳，但方仔的確喺谷草主場威啲，成功起孖兼攞到季內谷草第41W，打破自己保持嘅練馬師谷草單季頭馬最多紀錄。 嚟到周日沙田賽事，安排咗9草2泥共11場賽事，作為季內泥地頭馬最多嘅練馬師，沈集成梗係要喺自己強項反擊，所以第1場五班1800米泥地嘅「志醒大將」同埋第5場四班1800米泥地嘅「凱明神駒」都要吼實。 沈集成今季喺泥地暫時取得10W冠絕同儕，當中泥地1800米成績更好，7次派馬上陣取得4冠1季，今期咁啱兩場泥地都係跑1800米，真係開正佢嗰瓣啦。「志醒大將」上仗除咗羊毛面箍同埋交叉鼻箍跑田草1600米，結果後上取得殿軍，今次再增程應該問題不大，而此駒1月尾曾於泥地1200米跑獲第6名，今次改用艾兆禮或會有驚喜。