神鵰大摩撚手貨 13/06/2026 傳奇練馬師大摩退休後，依然活躍香港馬圈，兼且進身馬主行列，之前做過豐富多彩團體嘅成員，養過一匹「豐盛多彩」先後交畀高伯新、黎昭昇同埋韋達訓練，並取得2場頭馬。 大摩 不過，大摩已經退出呢個賽馬團體，反而同太太fifi姐及一眾馬主好友，包括「猴王」系張漢傑、「新力」系嘅黃良柏、「甜將」馬主黃展亮及「活力輝煌」馬主周祈銳組成再創新高團體，一齊養馬，睇吓呢個陣容，都算星光熠熠。 「神鵰」台型十足，試閘有好走勢。 大摩講過曾經希望想呢個團體嘅英文名John Moore Racing Syndicate，但最終馬會唔批，而作為再創新高團體首匹名下馬，「神鵰」自然係大摩嘅揀手貨，雖然已經跑8場，亦得2冠2亞1季，曾挑戰二級賽得第5名，來港前一仗轉爭表列賽亦得季軍，證明有一定卡士，雖然本身未跑過泥地，但埋門試泥閘走勢唔差，睇吓能否一鳴驚人，到時大摩又可以同呢班老友一齊拉頭馬？