君子周六再狂歡 13/06/2026 馬場都市傳說之一，就係周六賽日例有冷門爆出嚟，好似上個月9日周六田戰，文家良訓練嘅「君子」就以158倍巨冷姿態贏馬開齋，兼且捧走香港傷健策騎協會盃，令到沙田馬場成地眼鏡碎。相隔一個月多啲，今日又係周六田戰，「君子」再度登場跑返贏馬路程四班田草1200米，究竟能否再次建功呢？ 梁家俊 其實「君子」上仗賠率咁冷，唔係冇原因，事關呢匹4歲愛爾蘭自購馬今季出道後，頭6戰名次都係雙位數，上仗仲要抽不利嘅12檔，點知可以擊敗「星辰千帥」及「錶之浩瀚」呢兩匹其後可以贏馬嘅對手，表現大幅進步，馬主王宗彥話上場見到當日頭幾場賽事後，兼且場地受天雨影響，吩咐鞍上人梁家俊盡量跟前啲跑，結果趁地淋建功。今次此駒雖然要孭135磅，但本身評65分插班，現居四班仍有優勢，若然臨場天氣又有變化，隨時又畀到驚喜大家。 「君子」上次在周六賽事爆巨冷勝出。