6月第3次上陣 深心星打鐵趁熱 21/06/2026 即使依家有4W嘅領先優勢，但目前居榜首嘅方嘉柏依然唔可以放鬆，事關廖康銘及沈集成仍窮追不捨，今日沙田賽事呢兩個馬房各自強陣出擊，萬一畀佢哋連贏幾場，練馬師榜形勢立即變緊湊，因此方仔今日同樣派咗兩匹新勝馬「共享富裕」及「仁仁有餘」，但如果講機會，可能匆匆再出角逐第5場四班1600米嘅「深心星」，配雷神出戰更值得吼實。 莫雷拉 由於過去一年「深心星」嘅兩膝做過兩次關節鏡手術移除碎骨，所以呢匹4歲馬自從上年3月23日贏馬開齋後，足足抖咗一年零兩個幾月先喺本月6日復出，結果喺嫌短嘅田草1200米跑第6名，然後隔一周再出跑1400米幾乎一放到底，只係輸畀「賢者威楓」跑第2名，今日喺6月內第3次上陣，證明馬匹腳患已無問題，重配莫雷拉亦係有利條件，況且今季方仔先後為「信心星」、「仁心星」及「滿心星」建功，只係差「深心星」未贏，睇吓能否為一直支持自己嘅馬主完成大滿貫？ 方嘉柏