力爭田草1000W　潘頓散發光年魅力 01/07/2025 啱啱禮拜日田戰騎足11場嘅潘頓，騎師王開飛1.15倍，以為佢可以輕鬆封王，結果佢都順利中三元，但小將黃智弘都贏3W，好彩潘頓仲有1亞1季先可以保住騎師王。不過，計埋「君子傳承」及「合夥飛馳」兩場頭馬，潘頓喺田草嘅累積頭馬數目已達998W，只差兩場就達1,000W大關，今日賽事全跑田草，相信以潘頓近期手風，應該可以完成目標，成為繼韋達後另一位能於田草突破1,000W嘅騎師。 潘頓 睇吓今日潘頓啲坐騎，應該上半場都可以起孖贏夠1,000W，好似第2場四班1000米嘅文廐初出馬「官金騏」，雖然來港日子唔算耐，但試咗兩課大閘都展現唔錯前速，埋門試泥地1200米大閘有前有後，今次初出搵直路賽專家潘頓，隨時好似早排嘅「駿馬之曲」一鳴驚人。 游達榮 至於出戰第5場二班1400米香港回歸盃嘅「光年魅力」，今季出道後8戰得3冠1亞2季兼未甩過獎金，兼且3W都係由潘頓建功，上次升上二班跑1400米贏得輕鬆，今次再跑同程對手冇增強，連捷機會樂觀，此匹游達榮麾下優質馬，隨時係潘頓田草第1,000場頭馬。 「光年魅力」上仗配潘頓取得田草1400米第3捷。